ხვალ, 9 დეკემბერს, თბილისის საქალაქო სასამართლოში დანიშნულ პროცესზე დასწრება სურს პატიმრობაში მყოფ საქართველოს მესამე პრეზიდენტს, მიხეილ სააკაშვილს. „მე ცუდად ვარ, მაგრამ ხვალ მსურს იმ სასამართლოზე დასწრება, რომელიც ჩემს სიკვდილ-სიცოცხლის საკითხს წყვეტს", - წერს სააკაშვილი წერილში, რომელიც ფეისბუკში მის ოფიციალურ გვერდზე გამოაქვეყნეს. три ექსპრეზიდენტის ადვოკატმა შალვა ხაჭაპურიძემ მედიას უთხრა, რომ თუ სააკაშვილი პროცესზე დასწრებას ვერ შეძლებს, შესაძლოა, დააყენონ საკითხი, რომ დისტანციურად ჩაერთოს ან პროცესი კლინიკაში გაიმართოს, თუმცა პირდაპირი ტრანსლაცია უზრუნველყოფილი იყოს. ხაჭაპურიძე ამბობს, რომ არ გეგმავს სასამართლო პროცესის გადადების მოთხოვნას. „პირიქით, რამდენიმე შუამდგომლობის დაყენებას ვაპირებთ. პირველი, ეს არის სასჯელის მოხდის ან გადავადების დასაბუთება, მეორე, ჩვენ მიერ როგორც "ვივამედიდან", ისე სხვადასხვა უწყებებიდან, გამოთხოვილია ინფორმაცია, რომელზეც პასუხები არ მიგვიღია. მესამე ინიციატივა იქნება, რომ თუ მოსვლას ვერ შეძლებს [მიხეილ სააკაშვილი], ან ვიზუალურად ჩაერთოს, ან კლინიკა „ვივამედში" ჩატარდეს პროცესი", - თქვა ადვოკატმა. ყოფილი პრეზიდენტის ინტერესების დამცველი განმარტავს, რომ კლინიკაში სასამართლოს ჩატარების პრაქტიკა არსებობს. „თუ სააკაშვილი ვერ შეძლებს სასამართლო პროცესზე დასწრებას ან „ვივამედიდან" არ იქნება სათანადო ცნობა, მაშინ ჩვენ დავაყენებთ შუამდგომლობას, რომ სასამართლო თავად მოვიდეს კლინიკაში, ოღონდ ერთი პირობით, მოხდეს პროცესის პირდაპირი ტრანსლაცია“, - დაამატა შალვა ხაჭაპურიძემ. 9 დეკემბერს, 13:00 საათზე საქალაქო სასამართლოში დანიშნულია სასამართლო პროცესი - მოსამართლე გიორგი არველაძემ სააკაშვილის ადვოკატების შუამდგომლობის საფუძველზე უნდა იმსჯელოს ყოფილი პრეზიდენტისთვის სასჯელის გადავადებაზე ან მისგან სრულად გათავისუფლებაზე. შუამდგომლობის საფუძველი ადვოკატებისთვის გახდა ჩატარებული ექსპერტიზების დასკვნები, რომლებშიც სააკაშვილის ჯანმრთელობის მდგომარეობა მძიმედ არის შეფასებული. არსებობს მოსაზრებაც, რომ ყოფილი პრეზიდენტი შეიძლება მოწამლული იყოს. სასამართლოს მოსამართლის სტატუსით მიმართავს სახალხო დამცველიც - მისი კონსილიუმი მიიჩნევს, რომ სააკაშვილის დიაგნოზი მეოთხე ხარისხის კახექსიაა და თუკი ყოფილი პრეზიდენტი წონის კლებას ამ ტემპით გააგრძელებს, რამდენიმე თვეში მისი სიცოცხლე საფრთხის წინაშე აღმოჩნდება. მსჯავრდადებული მიხეილ სააკაშვილი ექიმების მეთვალყურეობის ქვეშ 2022 წლის 12 მაისიდან იმყოფება კლინიკა "ვივამედში." ხელისუფლება ამბობს, რომ სახელმწიფო ყველაფერს აკეთებს მისი ჯანმრთელობისთვის, მაგრამ პაციენტი მკურნალობას რთულად ემორჩილება. ...