ირანის სამართალდამცავი უწყების მეთაური იმუქრება, რომ უფრო გადამწყვეტ ზომებს მიიღებს საპროტესტო გამოსვლების დასარბევად. ირანში უკვე მეოთხე თვეა მიმდინარეობს გამოსვლები მას შემდეგ, რაც სექტემბრის შუა რიცხვებში ჩადრის არასწორი ტარების გამო პოლიციამ დააკავა ახალგაზრდა ქალი, რომელიც დაკავების შემდეგ მალე საავადმყოფოში გარდაიცვალა. ამინის პოლიციის აკადემიაში სიტყვით გამოსვლისას, ჰოსეინ აშთარიმ განაცხადა, რომ უშიშროების ძალები აქამდე თავშეკავებულად მოქმედებდნენ მომიტინგეების მიმართ. მისი განცხადება ეწინააღმდეგება უფლებადამცველთა ჯგუფების შეფასებას, რომლის მიხედვითაც 450-ზე მეტი ადამიანი, მათ შორის ათობით არასრულწლოვანი, იქნა მოკლული გამოსვლების დროს. აშთარიმ განაცხადა, რომ რიგითი მოქალაქეების უსაფრთხოების დაცვის მიზნით პოლიცია "წითელ ხაზს" გაავლებს და "გადამწყვეტ ზომებს მიმართავს მათ წინააღმდეგ, ვინც საფრთხეს უქმნის ხალხს, და რომ ის [პოლიცია] უკან არ დაიხევს". ეს გაფრთხილება მოჰყვა კვირების განმავლობაში გამოთქმულ მზარდ მუქარებს ხელისუფლების მხრიდან იმის შესახებ, რომ სასტიკ პასუხს გასცემენ ნებისმიერ არეულობას. 8 დეკემბერს საინფორმაციო სააგენტო Mizan-მა გაავრცელა ინფორმაცია იმის შესახებ, რომ 24 წლის მოჰსენ შეხარი გახდა პირველი დემონსტრანტი, რომელიც სიკვდილით დასაჯეს მას შემდეგ, რაც უზენაესმა სასამართლომ არ დააკმაყოფილა განაჩენის გასაჩივრების მოთხოვნა. ...