უკრაინის საგარეო საქმეთა მინისტრი დმიტრო კულება მიიჩნევს, რომ დასავლეთს არ უნდა ეშინოდეს რუსეთის დაშლის. ამერიკული გამოცემა Wall Street Journal-ი, რომელსაც კულებამ ინტერვიუ მისცა, წერს, რომ უკრაინის დასავლელი პარტნიორები ერთიანი ძალისხმევით ცდილობენ, არ დაუშვან უკრაინის დამარცხება, მაგრამ ყველა არ იზიარებს მიზანს, რომ უკრაინის გამარჯვება სრულმასშტაბიანი უნდა იყოს, რაც გულისხმობს 2022 წლის თებერვლამდე დაკარგული ტერიტორიების - ყირიმის და დონეცკის და ლუგანსკის ოლქების ნაწილის დაბრუნებასაც. ამერიკული გამოცემის თანახმად, ზოგიერთი მოკავშირე შიშობს, რომ ეს ბირთვული იარაღის მქონე რუსეთში გამოიწვევს სრულ დესტაბილიზაციას, პოტენციურად მის დაშლასაც, ფართომასშტაბიან სამოქალაქო მღელვარებას და არაპროგნოზირებად შედეგებს მთელი მსოფლიოსთვის. ასევე ნახეთ ბირთვული სამართებელი, ხანგრძლივი ომი, მეტი მიწა - რა სურს და რა შეუძლია პუტინს? უკრაინის საგარეო საქმეთა მინისტრის განცხადებით, თავის დროზე დასავლეთში საბჭოთა კავშირის დაშლისაც ეშინოდათ. დმიტრო კულება მსოფლიოს მოუწოდებს, არ შეუშინდეს რუსეთის დაშლას და ნაცვლად იმაზე ფიქრისა, როგორ უნდა დაეხმარონ რუსეთს გადარჩენასა და საერთაშორისო თანამეგობრობის ნორმლურ წევრად გადაქცევაში, დროა ფაქტად მიიღონ, რომ რუსეთი ვერ იქნება მსოფლიო თანამეგობრობის ნორმალური წევრი. უკრაინის საგარეო საქმეთა მინისტრი არ ფიქრობს, რომ რუსეთის დაშლა მსოფლიოსაც დაშლის. კულება მიიჩნევს, რომ რუსეთს მისივე მოქალაქეები დაშლიან, როგორც ეს რუსეთის იმპერიის შემთხვევაში მოხდა. რაც შეეხება რუსეთის მიერ 2014 წლიდან ანექსირებულ ყირიმს, დმიტრო კულებას განცხადებით, ყირიმი უკრაინის სხვა ნაწილებისგან არაფრით განსხვავდება და უკრაინა დაიბრუნებს თავის ყველა ტერიტორიას, ყირიმის ჩათვლით. საგარეო საქმეთა მინისტრის თქმით, ნაწილს სამხედრო, ნაწილს კი, დიპლომატიური საშუალებებით დაიბრუნებენ, თუმცა, ჯერ საკმაოდ ადრეა ამ ორ საშუალებას შორის ბალანსის პროგნოზირება. რუსეთთან მოლაპარაკების პერსპექტივის შესახებ დასმულ შეკითხვას, კულებამ უპასუხა, რომ რუსეთი ემზადება ახალი შეტევებისთვის და არა მოლაპარაკებისთვის. ...