კრემლთან კავშირის მქონე ოლიგარქები ისკანდერ მახმუდოვი და ანდრეი ბოკარევი განაგრძობენ აქტიურ ბიზნეს საქმიანობას ლატვიაში და რიგაში კომპანიებს აკონტროლებენ როგორც პირადად, ასევე სხვა პირების მეშვეობით. ამის შესახებ გამოცემა The Insider-ი წერს. გამოცემის თანახმად, მახმუდოვს და ბოკარევს ლატვია არ მიიჩნევს საფრთხედ ქვეყნის ეროვნული უსაფრთხოებისთვის მიუხედავად იმისა, რომ რუსეთის არმიის მომმარაგებლები არიან და უფრო მეტიც, გრანტების სახით დღემდე იღებენ ევროკავშირის დაფინანსებას, რომელსაც ლატვიის ხელისუფლება ანაწილებს. The Insider-ის გამოძიების თანახმად, საუბარია ლატვიის ერთ-ერთ უმსხვილეს საწარმოზე, რიგის ქარხანა RER-ზე, რომელიც ელექტრომოწყობილობებს აწარმოებს მატარებლების, მეტროს ვაგონებისა და სხვა საქალაქო საზოგადოებრივი ტრანსპორტისთვის. ლატვიის რეესტრის მონაცემებით, RER-ის აქციების 36%-ს აკონტროლებს რუსული კომპანია TransComponent Holding-ი, რომლის 20-20% ეკუთვნით მახმუდოვს და ბოკარევს, 46% კი, ეკუთვნოდა მოსკოვურ კომპანია Krona Grup-ს, რომლის უკანაც ბოკარევი და მახმუდოვი დგანან. ასევე ნახეთ ტელეკომპანია „დოჟდს“ ლატვიაში მაუწყებლობის ლიცენზია გაუუქმეს გამოცემა The Insider-ი მახმუდოვს და ბოკარევს მოიხსენიებს „კრემლის დიდი ხნის მეგობრებად“. მათი ქვანახშირის მომპოვებელი და მანქანათმშენებელი კომპანიები იქცნენ რუსეთის სახელმწიფო დაკვეთების ერთ-ერთ ყველაზე მსხვილ შემსრულებლად. მახმუდოვი და ბოკარევი წილს ფლობდნენ იარაღის მწარმოებელ კონცერნ „კალაშნიკოვშიც“, სადაც მათი ერთ-ერთი პარტნიორი იყო რუსეთის თავდაცვის მინისტრის ამჟამინდელი მოადგილე ალექსეი კრივორუჩკო. The Insider-ის ცნობით, მახმუდოვმა და ბოკარევმა „კალაშნიკოვის“ წილებზე უარი თქვეს, თუმცა, საკუთარი ქარხნებიდან განაგრძეს რუსეთის სამხედრო გემებისთვის დიზელის მიწოდება. გამოცემის თანახმად, მახმუდოვი და ბოკარევი ფიგურირებდნენ „ფულის გათეთრების“ საქმეებშიც. 2007 წელს, გერმანიაში აღძრულ საქმეში ისინი მოხსენიებული იყვნენ „იზმაილოვსკის“ ორგანიზებული დანაშაულებრივი ჯგუფის საერთო ფულის, ე.წ. „ობშჩაკის“ მაკონტროლებლად, ხოლო 2008 წელს, ესპანეთში მიმდინარე გამოძიებაში ფიგურირებდნენ როგორც ტამბოვის ორგანიზებული დანაშაულებრივი ჯგუფის ფულის „გამთეთრებლები“. ...