„ნაციონალურმა მოძრაობის“ ლიდერებმა საქართველოს პრეზიდენტის ადმინისტრაციაში მიიტანეს ხელმოწერები, რითაც ითხოვენ პატიმრობაში მყოფი საქართველოს მესამე პრეზიდენტის „გათავისუფლებას“. ერთადერთი სამართლებრივი ბერკეტი, რომლითაც მოქმედ პრეზიდენტს, სალომე ზურაბიშვილს, მიხეილ სააკაშვილის გათავისუფლება შეუძლია, შეწყალებაა, თუმცა პარტიის ლიდერები მედიისთვის მიცემულ კომენტარში ამ სიტყვას არ ახსენებენ. ასევე ნახეთ ზურაბიშვილი სააკაშვილზე: ის არ არის ნავალნი „მე დარწმუნებული ვარ, რომ ჩვენი ასეთი ერთობა გამოიღებს შედეგს. მიხეილ სააკაშვილი უნდა იყოს თავისუფალი... სალომე ზურაბიშვილი ვალდებულია გაითვალისწინოს იმ ასიათასობით ქართველის და მოქალაქის მოთხოვნა და თხოვნა, რომლის პრეზიდენტიც თავად არის“, - ამბობს მიხეილ სააკაშვილის პირადი წარმომადგენელი სოფო ჯაფარიძე. მისი თქმით, 200 ათასამდე ხელმოწერა შეგროვდა საქართველოს რეგიონებში, მათ შორის ქუთაისში, ბათუმში, წალენჯიხაში და ა.შ. „ნაციონალურმა მოძრაობამ“ მიხეილ სააკაშვილის გათავისუფლების მოთხოვნით ხელმოწერების შეგროვება რამდენიმე კვირის წინ დაიწყო. საქართველოს პრეზიდენტს ამ თხოვნით არაერთხელ მიმართეს, თუმცა ეს გადაწყვეტილება მას არ მიუღია - სალომე ზურაბიშვილი, როგორც წესი, არ ამბობს, ვის შეიწყალებს და ვის - არა. თუმცა სააკაშვილის შეწყალებაზე მისი დაკავების დღესვე თქვა: „არა და არასოდეს“. ასევე ნახეთ სალომე ზურაბიშვილი: არავის არ ვიწყალებ! მორჩით სპეკულაციებს! საქართველოს ექსპრეზიდენტი, უკრაინის მოქალაქე მიხეილ სააკაშვილი, რომელსაც ორ საქმეზე 6-წლიანი პატიმრობა აქვს მისჯილი, საქართველოში 2021 წლის სექტემბრის ბოლოს დაბრუნდა. ის თვითმმართველობის არჩევნების წინა დღეს, 1 ოქტომბერს, დააკავეს. გარდა საზღვრის უკანონო კვეთისა, მის წინააღმდეგ წარმოებაშია კიდევ ორი საქმე: 2007 წლის 7 ნოემბერს აქციის ძალადობრივად დაშლის საქმე და ე.წ. პიჯაკების საქმე, რომელშიც პროკურატურა საქართველოს მესამე პრეზიდენტს სახელმწიფო ფინანსების გაფლანგვას ედავება. მიხეილ სააკაშვილი ჯანმრთელობის მდგომარეობის გაუარესების გამო 2022 წლის 12 მაისს რუსთავის მე-12 პენიტენციური დაწესებულებიდან კლინიკა „ვივამედში“ გადაიყვანეს. ის ამჟამად კლინიკაში იმყოფება. ...