გამარჯვების შემდეგ ფეხბურთელები თბილისში, რესპუბლიკის მოედანზე, სკანდირებდნენ: „აფხაზეთი საქართველოა, სამაჩაბლო საქართველოა“. ტელეგრამ-არხი „რესპუბლიკა“ წერს, რომ: „ხელისუფლებებს, რომლებიც სპორტული ღონისძიებების წესებსა და ჩარჩოებს განსაზღვრავენ, რეაქცია უნდა ჰქონდეთ საქართველოს ნაკრების ფეხბურთელების არაადეკვატურ საქციელზე“. სოციალურ ქსელში გამოაქვეყნეს სტატია, რომელშიც წერია, თუ როგორ დააჯარიმა 2022 წელს ფიფამ სერბეთის საფეხბურთო კავშირი - გასახდელში ეროვნულ ნაკრებს ჰქონდა დროშა, რომელზეც კოსოვო სერბეთის შემადგენლობაში იყო გამოსახული. მწვავე დისკუსია გაიმართა აფხაზი ჟურნალისტის, როინ აგრბას იმ ფეისბუკპოსტის ქვეშ, რომელიც საქართველო-საბერძნეთის მატჩის შედეგებს ეხებოდა. აი, კომენტარების ნაწილიც: „მათთვის ეს მართლაც ისტორიული წარმატებაა“. „მათ კარგი შემადგენლობა ჰყავთ. ჩაკვეტაძე კვარაცხელიაზე ნაკლებად როდი თამაშობს“. „თავიდან ვიფიქრე, რა ყოჩაღები არიან, ევროპის ჩემპიონატზე გავიდნენ-მეთქი (მეზობლურად მინდოდა მიმელოცა), მაგრამ ფეხბურთელებმა აფხაზეთსა და ოსეთზე რომ დაიწყეს სკანდირება, ეს სურვილი გამიქრა (ფეხბურთელებს ეს არ უხდებათ, მიტინგზე ხომ არ არიან!)“. „და ჩვენ რა გვესაქმება ამ ყველაფერთან? მით უფრო, რომ მთელი გუნდი თამაშის მერე ყვიროდა: აფხაზეთი საქართველოა, სამაჩაბლო საქართველოა, და სტადიონიც ისტერიკულად იმეორებდა მათ სიტყვებს. სანამ მათ ტვინებსა და პოლიტიკაში ეს ფრაზებია, მათი წარმატება არ მაინტერესებს, არც სპორტში და არც სხვა სფეროებში“. „ვნახე ვიდეო (მთელი „ტიკ-ტოკი“ წალეკეს), რომელშიც გულშემატკივრები და ფეხბურთელები თავიანთ საყვარელ ლოზუნგებს გაჰყვირიან. ვუსურვებ, რაც შეიძლება მალე გამოვარდნენ. სპორტი და ხელოვნება პოლიტიკას არ უნდა ეხებოდეს“. კომენტარებში ქართველებიც გამოჩნდნენ: „მალე ერთად ვიზეიმებთ საქართველოს გაერთიანებას“. აფხაზი ოპოზიციონერი თემურ ნადარაია: „ჩვენ, აფხაზეთის ნაკრები, შეიძლება კიდევ 100 წელი ვერ მოვხვდეთ ევროპის ჩემპიონატზე, მაგრამ თქვენთან ერთად ერთ სახელმწიფოში ცხოვრებას მაინც არ ვაპირებთ. ვცხოვრობდით უკვე საქართველოს სსრ-ის ფარგლებში, „აფხაზპერესელენცსტროის“ გამოისობით. აფხაზურ ენაზე ლაპარაკის უფლება არ გვქონდა, იყო ომი და გენოციდი. კარგი არაფერი გვინახავს. ახლა არაღიარების პოლიტიკის, ეკონომიკური და სხვა სანქციების გამო, მათ შორის სპორტში, ევროპის ღონისძიებებში ვერ ვმონაწილეობთ. არა უშავს, ამასაც გავუმკლავდებით, გამოსავალს ვიპოვით. მთავარია, ჩვენთან ფეხბურთი უყვართ. აფხაზეთის ჩემპიონატი არსებობს. არაღიარებულ ქვეყნებს შორის მსოფლიო ჩემპიონატიც არსებობს. ჯერ ასეა, მაგრამ ჩვენს დამოუკიდებლობასა და თავისუფლებას ყველაზე მეტად ვაფასებთ. ეს დაიმახსოვრეთ“. ჟურნალისტი როინ აგრბა: „ყოველთვის ასე ხდება. როცა 2016 წელს ჩვენმა ნაკრებმა Co...