აშშ მსჯელობს კიევში, ამერიკის საელჩოში, ახალი სამხედრო მრჩევლების გაგზავნის საკითხზე. ამის შესახებ იტყობინება Politico. პენტაგონის წარმომადგენლის, გენერალ-მაიორ პატრიკ რაიდერის სიტყვებით, მრჩევლები არ მიიღებენ მონაწილეობას საომარ მოქმედებებში, ისინი კონსულტაციას გაუწევენ და მხარს დაუჭერენ უკრაინის ხელისუფლებასა და შეიარაღებულ ძალებს. „ოპერატიული უსაფრთხოებიდან გამომდინარე“, რაიდერს არ დაუსახელებია მრჩევლების ზუსტი რაოდენობა. Politico წყაროებზე დაყრდნობით წერს, რომ კიევში შესაძლოა გაემგზავროს 60 ადამიანი. დამატებითი ძალები უკრაინას დაეხმარებიან ლოგისტიკურ საკითხებში, ასევე იმ შეიარაღების მეთვალყურეობაში, რომელსაც აშშ უკრაინას უგზავნის, - ეუბნებიან გამოცემას ამერიკელი ჩინოვნიკები, რომელთა ვინაობაც დასახელებული არ არის. 20 აპრილს, აშშ-ის კონგრესის წარმომადგენელთა პალატამ მრავალთვიანი დისკუსიების შემდეგ დაამტკიცა უკრაინისთვის დახმარების გამოყოფა. ეს ნაწილია უფრო ფართო პაკეტისა, რომელიც ასევე ითვალისწინებს დახმარებას ვაშინგტონის სხვა მოკავშირეებისთვისაც, მათ შორის ისრაელისთვის და ტაივანისთვის. მთლიანობაში პაკეტი მოიცავს 95,3 მილიარდ დოლარს, რაც შეესაბამება იმ თანხას, რომელიც აშშ-ის სენატმა თებერვალში დაამტკიცა. მაგრამ წარმომადგენელთა პალატის პაკეტში რამდენიმე განსხვავებაა სენატის დოკუმენტთან შედარებით. მიმომხილველთა აზრით, ამ განსხვავებების მიზანი იყო, დაეშოშმინებინა წარმომადგენელთა პალატის კონსერვატორები. დოკუმენტის თანახმად, უკრაინა მიიღებს 60,84 მილიარდ დოლარს. როგორც Politico იტყობინება აშშ-ის მაღალი რანგის მოხელეებზე დაყრდნობით, პენტაგონი ემზადება, სწრაფად დაამტკიცოს უკრაინისთვის უკიდურესად აუცილებელი იარაღის სია, მათ შორის საარტილერიო ჭურვები და საჰაერო თავდაცვის საშუალებები. საგარეო საქმეთა სამინისტრო საამისოდ ელოდებოდა დახმარების კანონპროექტის დამტკიცებას. ასევე ნახეთ აშშ-ის წარმომადგელთა პალატამ უკრაინის დახმარების პაკეტი დაამტკიცა ...