რუსთაველის გამზირზე, პარლამენტთან, აქციაზე სახელწოდებით „არა რუსულ კანონს”, 21 აპრილს ისევ შეიკრიბებიან ახალგაზრდები. ეს პირობა მათ გუშინ, 20 აპრილს, გვიან ღამით, აქცია-მსვლელობის დასრულების შემდეგ დადეს. მეოთხე დღეა სტუდენტები, ახალგაზრდები, რუსთაველის გამზირზე იკრიბებიან და შემდეგ ისინი მსვლელობებს მართავენ სხვადასხვა მიმართულებით: „სად წავალთ ხვალ, ამას ხელისუფლებისთვის სიურპრიზად დავტოვებთ“, - თქვა 20 აპრილს აქციის ერთ-ერთმა მონაწილემ. ახალგაზრდების მსვლელობა, 20 აპრილი 20 აპრილს ახალგაზრდები პარლამენტიდან პრეზიდენტის რეზიდენციისკენ გაემართნენ. 19 აპრილს ისინი ჯერ იუსტიციის სახლთან მივიდნენ, შემდეგ კი მსვლელობით გმირთა მემორიალისკენ გადაინაცვლეს, სადაც ფიცი დადეს, რომ ბრძოლას არ შეწყვეტენ. „ჩვენ, საქართველოს მოქალაქეები, ქართველი პატრიოტები, შევიკრიბეთ აქ, გმირთა მოედანზე, რათა პატივი მივაგოთ მათ ხსოვნას და დავდოთ ფიცი, მათი სულების წინაშე, ვფიცავ, რომ არასდროს დავთმობთ მათი სიცოცხლის ფასად მოპოვებულ თავისუფლებას. ვფიცავ, რომ არასდროს შევურიგდებით ძალას, რომელიც ჩვენი ქვეყნის მტრისთვის, რუსეთისთვის დათმობას ცდილობს. ვიდგებით ერთმანეთის მხარდამხარ და დავიცავთ საქართველოს სახელმწიფოებრიობას, ჩვენს ენას, ჩვენს მამულს და ერთობას. ვფიცავ! ვფიცავ! ვფიცავ!" - ასეთია მათი ფიცი. რუსთაველის გამზირზე, პარლამენტის შენობის წინ მასშტაბური საპროტესტო აქციები 15 აპრილიდან იმართება. მრავალათასიან აქციაზე აპროტესტებენ „აგენტების კანონს“, რომელსაც საზოგადოების დიდი ნაწილი, პოლიტიკოსები და მედია „რუსულ კანონს“, ხოლო „ქართული ოცნება“ „გამჭვირვალობის“ კანონს უწოდებს. საერთაშორისო პარტნიორების მწვავე კრიტიკისა და გაფრთხილებების მიუხედავად, 17 აპრილს, „აგენტების კანონი“, პლენარულ სხდომაზე „ქართული ოცნების“ უმრავლესობამ პირველი მოსმენით დაამტკიცა - 83 ხმით 0-ის წინააღმდეგ. 18 აპრილიდან კი საკუთარი ინიციატივით, რუსთაველის გამზირზე საპროტესტო აქციებს მართავენ ახალგაზრდები და მოითხოვენ „აგენტების კანონის“ უკან გაწვევას. ასევე ნახეთ „არა რუსულ კანონს, კი ევროპას! - ახალგაზრდები რუსთაველზე ისევ შეიკრიბნენ ...