რუსეთში დაბლოკილია ვებსაიტი საერთაშორისო ორგანიზაციისა „რეპორტიორები უსაზღვრებოდ“ (Reporters sans frontieres). ამას ყურადღება მიაქცია პროექტმა „როსკომსვობოდამ“, რომელიც რუსეთში ინტერნეტის ცენზურის ფაქტებს ადევნებს თვალყურს. დაბლოკვის მიზეზები მითითებული არ არის. იტყობინებიან, რომ ეს ხორციელდება „სახელმწიფო ორგანოს“ მოთხოვნით. ორგანოს დასახელება არ არის მითითებული. როგორც წესი, საიტების ასეთი დაბლოკვის ინიციატორი არის ხოლმე რუსეთის გენერალური პროკურატურა. „რეპორტიორები უსაზღვრებოდ“ არის არასამთავრობო ორგანიზაცია, რომლის ყურადღების ცენტრშია სიტყვისა და ჟურნალისტების უფლებების დაცვა მთელს მსოფლიოში. სხვა საქმიანობასთან ერთად, ის რამდენიმე წელიწადში ერთხელ აქვეყნებს „პრესის თავისუფლების მტრების“ რეიტინგს - პოლიტიკოსებისა, რომლებიც, ორგანიზაციის აზრით, დამოუკიდებელ მედიას ავიწროებენ თავ-თავიანთ ქვეყნებში. უკანასკნელ წლებში რუსეთიდან ამ რეიტინგში შედიან ქვეყნის პრეზიდენტი ვლადიმირ პუტინი და ჩეჩნეთის ლიდერი რამზან კადიროვი. ასევე ნახეთ "როსკომნადზორმა", როგორც ჩანს, პირდაპირ დაიწყო საიტების დაბლოკვა გარდა ამისა, „როსკომსვობოდას“ თანახმად, დაიბლოკა უკრაინელი ბიზნესმენის, ვიქტორ პინჩუკის ფონდის ვებსაიტი - ასევე „სახელმწიფო ორგანოს“ მითითებით, რომლის შესახებ სრული ინფორმაცია არ არის დასახელებული. ასევე დაბლოკილია პროექტი „OSINT-пчёлы“ (ის დახმარებას სწევს ღია წყაროების საშუალებით რუსეთის იმ სამხედროების დადგენაში, რომლებიც უკრაინაში იბრძვიან); მორიგი დომენი პროექტისა „ხოჩუ ჟიტ“ (მინდა ვიცოცხლო), რომელიც განკუთვნილია უკრაინის შეიარაღებული ძალების ტყვედ ჩაბარების მოსურნე რუსი ჯარისკაცებისთვის; და ვებგვერდი რუსეთის მოქალაქეებისადმი მიმართვით პოლონური საიტისა Legion Polski. უკრაინაში რუსეთის სრულმასშტაბიანი შეჭრის დაწყების შემდეგ რუსეთში დაიბლოკა ასიათასობით საინტერნეტო რესურსი, მათ შორის მსხვილი სოცქსელები და მრავალი დამოუკიდებელი მედიასაშუალების საიტები. ...